नाशिक ठरला गट विजेता,सेक्रेटरी इलेव्हनवर दणदणीत मात

वरिष्ठ महिला आमंत्रितांच्या क्रिकेट स्पर्धा- ऐश्वर्या वाघची प्रभावी गोलंदाजी, साक्षी-तेजस्वीनीची दमदार भागीदारी

नाशिक-महाराष्ट्र क्रिकेट असोसिएशनच्या राज्यस्तरीय, वरिष्ठ महिला आमंत्रितांच्या अव्वल साखळी क्रिकेट ( इन्व्हिटेशन सुपर लीग ) स्पर्धेत नाशिकने सेक्रेटरी इलेव्हनवर १० गडी राखून दणदणीत विजयासह एकूण पाच संघांच्या अ गटाचे विजेतेपद मिळवत स्पर्धेत प्रथम स्थान मिळवले.

एम जी एम मैदान , छ. संभाजी नगर ( औरंगाबाद ) येथे खेळताना प्रथम फलंदाजी मिळालेल्या सेक्रेटरी ११ संघाविरुद्ध नाशिकच्या गोलंदाजांनी टिच्चून मारा करत २० षटकांत ४ बाद ६३ इतकीच मजल मारून दिली. खास करून डावखुरी फिरकीपटू ऐश्वर्या वाघने ४ षटकांत केवळ ४ धावा देत ३ बळी घेत अतिशय प्रभावी कामगिरी केली. लक्ष्मी यादवने एक बळी घेतला. विजयासाठीच्या ६४ धावा सलामीवीर साक्षी कानडी व तेजस्विनी बाटवालच्या जोरदार भागीदारी च्या जोरावर नाशिकने अतिशय रुबाबात केवळ १४.५ षटकांत फटकावल्या. साक्षी २८ व तेजस्विनी २७ धावांवर नाबाद राहिल्या . साखळी स्पर्धेतील हा चौथा व शेवटचा सामना पावसाने प्रभावित मैदानामुळे एक दिवसीय ५० ऐवजी २० षटकांचा घेण्यात आला.

एमसीएब्लू विरूध्दचा सामना अनिर्णित

तिसरा नाशिक विरुद्ध एम सी ए ब्ल्यु सामना पावसामुळे अनिर्णित राहिला होता. त्या सामन्यात गरवारे मैदान , छ. संभाजी नगर ( औरंगाबाद ) येथे खेळताना प्रथम फलंदाजी करत नाशिकने सलामीवीर यष्टिरक्षक तेजस्विनी बाटवालच्या ५२ व रसिका शिंदेच्या महत्वपूर्ण नाबाद ५२ धावांच्या जोरावर, ५० षटकांत ९ बाद १७० धावा केल्या. आस्था संघवीने २० धावा केल्या. तेजस्विनी बाटवाल व आस्था संघवीने दुसऱ्या गड्यासाठी ८६ तर रसिका शिंदे व श्रुती गीते यांच्या आठव्या गड्यासाठी ५८ या दोन भागीदाऱ्यांमुळे नाशिकच्या धावसंख्येला आकार मिळाला. नाशिकचा डाव संपल्यानंतर जोरदार पावसामुळे उर्वरित खेळ होऊ शकला नाही व सामना अनिर्णित राहिला होता .

चार पैकी तीन सामने खिशात

या प्रकारे नाशिक महिला संघाने ४ पैकी ३ सामने – मेट्रो, अहमदनगर व सेक्रेटरी ११ – विरुद्धचे निर्णायकरित्या जिंकून या महाराष्ट्र क्रिकेट असोसिएशनच्या राज्यस्तरीय आमंत्रितांच्या अव्वल साखळी क्रिकेट ( इन्व्हिटेशन सुपर लीग ) स्पर्धेत सर्वाधिक गुण मिळवून उत्कृष्ट धावगती च्या आधारावर प्रथम स्थान मिळवले. एकूण स्पर्धेत नाशिक संघाने उत्कृष्ट सांघिक कामगिरी करतानाच , विशेष उल्लेखनीय फलंदाजीत कर्णधार प्रियांका घोडके ( ७ सामन्यातील ६ डावात १ शतक व १ अर्धशतकासह २४८ धावा ) , साक्षी कानडी ( ७ सामन्यातील ७ डावात १ अर्धशतकासह १९४ धावा ) , तेजस्विनी बाटवाल ( ७ सामन्यातील ७ डावात १ अर्धशतकासह १८७ धावा ) व उपकर्णधार रसिका शिंदेने ( ७ सामन्यातील ५ डावात १ अर्धशतकासह १५२ धावा ) अशी तर गोलंदाजीत ऐश्वर्या वाघ ( ५ डावात १३ बळी ) , माया सोनवणे ( ६ डावात १० बळी ) व प्रियांका घोडकेनेहि ( ६ डावात ८ बळी ) अशी अष्टपैलू छाप पाडत लक्षणीय कामगिरी केली. संघ प्रशिक्षकपदाची जबाबदारी भावना गवळी यांनी पार पाडली .

या राज्यस्तरीय स्पर्धेतील उज्ज्वल यशा बद्दल नाशिक क्रीडा क्षेत्रात आनंदाचे वातावरण असून जिल्हा क्रिकेट संघटनेचे चेअरमन विनोद शहा, सचिव समीर रकटे यांनी सर्व खेळाडुंचे खास अभिनंदन केले आहे